Tuesday, 20 August 2013

دفتر اسامى الهاموش

يا دفعة يا مرمى ف كشك الحراسة.. لحد أما يطلع عليك النهار
يا صبحى محمد سعيد الفواعلى.. نزيـل المــوائد ف سـاعة الفطــار
يا كردى يا صالح يا جندى المراسلة.. توصــل مدام إنشراح بالخضــار
وترجع تجيب العيال م الحضانة.. وتطلع توّدى فلوس الإيجار
وسيد بشندى بتاع النضافة.. بيكنس تقاطع لاظوغلى ونوبار

ومحسن عفيفى بيقطع تذاكر.. ف خط المنيرة لحد المطار
وسعد المنادى ف خط العبور.. أخو أحمد قناوى أشارجى المرور
وأشــرف شرارة ف نفــس الإشارة.. بيطلع يوزع بواكى البخور
وعبده السواحلي بتاع الفريسكا.. بيسرح يوماتى ف شط الزهور
ودفتر أسامى الهاموش و الغلابة.. بيكبــر.. ولا توفّيــهوش الكتابة
وتسمن وتتخن كروش الديابة.. بلحم اللي ماتوا ف أخــر الطابور

قصيدة دفتر اسامى الهاموش - مصطفى إبراهيم


No comments:

Post a Comment